Qeveria shqiptare ka shpallur një objektiv ambicioz për të punësuar 40 mijë të rinj brenda katër viteve të ardhshme, si pjesë e një strategjie të gjerë për të frenuar emigrimin dhe për të forcuar kapitalin njerëzor në vend. Programi është pjesë e Garancisë Rinore, një nismë e përbashkët me Bashkimin Europian, e cila synon t’u japë të rinjve shqiptarë mundësi konkrete për punësim ose formim profesional, në mënyrë që të mos e shohin më emigrimin si zgjidhje të vetme për të ardhmen.
Në një intervistë për emisionin “Terminal” me gazetaren Aurora Sulçe në A2 CNN, ministrja e Ekonomisë dhe Financave, Delina Ibrahimaj, deklaroi se qëllimi i qeverisë është të krijojë një mjedis ku të rinjtë të ndihen të motivuar të ndërtojnë jetën e tyre në Shqipëri.

“Ne do të angazhohemi jo vetëm përmes politikës së financimit të startup-eve, por edhe përmes politikës së garancisë rinore. Në 4-vjeçarin e ardhshëm do të punësojmë 40 mijë të rinj, ose do t’u ofrojmë formim profesional që t’i bëjmë më të punësueshëm. Siguria e zhvillimit ekonomik është e rrënjësuar te kapitali njerëzor,” – tha Ibrahimaj.

Sipas saj, çdo i ri dhe e re duhet të ketë mundësi të bëjë një jetë të denjë në vendin e vet, duke punuar, studiuar dhe ndërtuar karrierën këtu. Ministrja shtoi se, pavarësisht se emigrimi nuk mund të ndalohet, për shkak të lirisë së lëvizjes që garanton Bashkimi Europian, detyrimi i qeverisë është të krijojë kushte që Shqipëria të jetë një vend që “ia vlen të jetohet”.

Programi i garancisë rinore parashikon bashkëpunim mes institucioneve publike, sektorit privat dhe organizatave të trajnimit profesional. Përmes tij, të rinjtë që përfundojnë arsimin do të kenë mundësi brenda 4 muajve të regjistrohen në një punë, të ndjekin një kurs profesional ose të nisin një iniciativë të re sipërmarrëse me mbështetje financiare dhe mentorim.

Një tjetër komponent i rëndësishëm i planit është financimi i startup-eve rinore, që do të ofrojë grante dhe kredi të garantuara për idetë inovative në teknologji, bujqësi, turizëm dhe industri krijuese. Qeveria synon që përmes këtij mekanizmi të rrisë ndjeshëm punësimin cilësor, veçanërisht në sektorët që gjenerojnë vlerë të shtuar dhe ndikim të qëndrueshëm në ekonomi.

Sipas vlerësimeve paraprake, programi do të financohet pjesërisht nga fondet e Bashkimit Europian dhe pjesërisht nga buxheti i shtetit, me synimin për të ulur papunësinë e të rinjve nën 29 vjeç në më pak se 15% deri në vitin 2028.