Një shpërthim i fuqishëm ka tronditur shtetin e Tenesit në SHBA, duke shkaktuar viktima dhe persona të zhdukur. Ngjarja ndodhi në një fabrikë prodhimi eksplozivësh në zonën e Bucksnort, rreth një orë në jug të qytetit Nashville. Zyra e Sherifit të Qarkut Hickman ka konfirmuar se shpërthimi ka ndodhur në kompaninë Accurate Energetic Systems, e cila prodhon materiale shpërthyese për përdorim ushtarak dhe industrial.

“Mund të konfirmojmë se ka pasur një shpërthim në Accurate Energetic Systems. Shërbimet e emergjencës janë aktualisht në vendngjarje duke punuar për të adresuar situatën,” thuhet në deklaratën zyrtare të sherifit.

Mediat amerikane raportojnë për persona të zhdukur dhe dyshohet për disa të vdekur, ndërsa ekipet e shpëtimit po kërkojnë nën rrënoja. Pamjet nga vendngjarja tregojnë tym të dendur dhe flakë të mëdha, që kanë përfshirë të gjithë kompleksin industrial. Autoritetet kanë mbyllur rrugët përreth zonës dhe kanë urdhëruar banorët e afërt të qëndrojnë në shtëpi për shkak të rrezikut nga substancat kimike.

Shkaku i shpërthimit mbetet ende i paqartë, ndërsa hetimet janë në vijim. Burime nga vendngjarja paralajmërojnë se bilanci i viktimave mund të rritet, pasi disa punëtorë rezultojnë ende të zhdukur.