Një ngjarje e rëndë dhe tronditëse ka ndodhur në Castel D’Azzano, në provincën e Veronës, ku 3 karabinierë humbën jetën dhe 16 ushtarë e oficerë policie u plagosën pas një shpërthimi të fuqishëm në një banesë dykatëshe. Policia kishte shkuar për të evakuar shtëpinë ku banonin tre familjarë dy vëllezër dhe motra e tyre kur ndodhi shpërthimi që shkatërroi plotësisht ndërtesën, duke i zënë nën rrënoja forcat e sigurisë.

Burimet pranë hetuesve tregojnë se e gjithë banesa ishte mbushur me gaz, dhe shpërthimi ndodhi kur u hap dera e përparme. Familjarët, Dino dhe Maria Luisa Ramponi, u arrestuan në vendngjarje, ndërsa vëllai i tyre, Franco, u kap dhe u arrestua mëngjesin pas ngjarjes.

Kryeprokurori i Veronës, Raffaele Tito, e përshkroi ngjarjen si një “tragjedi të pabesueshme”, duke theksuar se karabinierët dhe policia vepruan me maksimumin e kujdesit dhe me të gjitha mjetet e nevojshme, por rezultati ishte fatal dhe shumë i dhimbshëm.

Sipas hetimeve, tre të arrestuarit akuzohen për vrasje me paramendim. Ky incident nuk është i pari i këtij lloji: në tetor 2024, familjarët kishin mbushur shtëpinë me gaz për të parandaluar dëbimin, por atëherë situata u zgjidh pa incidente serioze, pasi dhomat u ajrosën. Po atëherë, një prej tyre kërcënoi se do t’i vinte flakën vetes, duke u lyer me benzinë.

Sipas raportimeve, në banesë kishte të paktën pesë apo gjashtë bombola gazi, ndërsa shpërthimi dyshohet të ketë ndodhur në katin e parë të ndërtesës.

Ngjarja la pas një skenë apokaliptike dhe ka tronditur thellë komunitetin dhe institucionet ligjzbatuese të rajonit. Hetimet vazhdojnë për të zbardhur të gjitha detajet dhe rrethanat e sakta të kësaj tragjedie,