Një rast i pazakontë bigamie është zbuluar së fundmi në Montecatini Terme, në provincën italiane të Pistoias, me protagoniste një grua me origjinë shqiptare. Zbulimi është bërë krejt rastësisht, gjatë një procedure rutinë për aplikim leje qëndrimi për arsye familjare.

E reja, e cila jeton në Shqipëri, kishte deklaruar se ishte martuar rishtazi me një shqiptar tjetër rezident në Montecatini. Por, gjatë verifikimeve, autoritetet italiane zbuluan se gruaja kishte një martesë të mëparshme me një shtetas italian në Milano që prej vitit 2004, një martesë që nuk ishte zgjidhur kurrë me divorc.

Në mars të vitit 2025, ajo kishte lidhur një martesë të dytë, në mënyrë të paligjshme, me bashkëkombësin në Montecatini, duke krijuar kështu një rast të pastër të bigamisë.

Pas këtij zbulimi, Policia vendase vendosi të pezullojë menjëherë procedurën për lëshimin e lejes së qëndrimit, ndërsa gruaja u referua në autoritetet gjyqësore nën akuzën e bigamisë, një vepër penale e parashikuar në nenin 556 të Kodit Penal italian.

Sipas ligjit italian, çdo person që, pa u divorcuar nga martesa e parë, lidh një martesë të dytë, rrezikon nga 1 deri në 5 vite burg. I njëjti dënim zbatohet edhe për atë që martohet me një person të martuar, nëse është i vetëdijshëm për këtë status. Për më tepër, kur partneri mashtron bashkëshortin e ri duke u paraqitur si i pamartuar, ligji parashikon rrethana rënduese.

Hetimet vijojnë, për të zbardhur çdo detaj të mundshëm, si dhe për të kuptuar nëse ka patur edhe manipulim të dokumenteve apo mashtrim të autoriteteve në procesin e aplikimit për qëndrim.

Ndërkohë, qyteti i vogël termal është trazuar nga ky episod, që nga shumë qytetarë është komentuar si një rast “si në filmat italianë”, por që është konfirmuar me dokumente zyrtare. Në pritje të vendimit të drejtësisë, leja e qëndrimit e gruas shqiptare mbetet e pezulluar.