Një aksident tragjik ka ndodhur pasditen e së premtes pranë qytetit të Sremska Mitrovica në Serbi. Një autobus që transportonte punëtorë të një fabrike pajisjesh mjekësore është përmbysur në rrugën rajonale mes Sremska Mitrovica dhe fshatit Jarak, rreth 70 kilometra nga Beogradi.

Nga aksidenti humbën jetën tre persona, dy në vendngjarje dhe një tjetër në spital. Të paktën 39 të tjerë mbetën të plagosur, ndërsa 8 ndodhen në gjendje të rëndë në terapi intensive.

Në vendngjarje mbërritën gjashtë ekipe emergjence, ndërsa 61 pasagjerë në total u morën në kujdes nga spitali i përgjithshëm i Sremska Mitrovica. Njëri prej të plagosurve është transferuar në Novi Sad për trajtim të specializuar.

Shoferi i autobusit, një 70-vjeçar me inicialet D.K., është arrestuar dhe do të mbahet në ndalim për 48 orë nën akuzën e “shkeljes së rregullave të sigurisë së trafikut”.

Autoritetet serbe njoftuan se kompania “Sirmium Bus”, që operonte mjetin, ishte kontrolluar disa herë vitet e fundit dhe ishin konstatuar mbi 60 shkelje.

Kryetari i Sremska Mitrovica, Branislav Nedimović, ka shprehur ngushëllimet për viktimat dhe ka shpallur të dielën Ditë Zie në qytet.