Një lajm i trishtë ka ardhur nga Greqia, ku është ndarë nga jeta në moshën vetëm 28-vjeçare Joana Qyli, e reja me origjinë nga Korça, familja e së cilës prej vitesh jeton në Selanik.

Joana ishte një vajzë e jashtëzakonshme, e njohur për talentin, përkushtimin dhe mirësinë e saj. Pas përfundimit të studimeve në Selanik dhe më pas në Holandë, ajo arriti të ndërtonte një karrierë të suksesshme në institucionet europiane, duke qenë për disa vite pjesë e stafit të Parlamentit Europian.

Në të njëjtën kohë, Joana kishte shërbyer edhe pranë Konsullatës së Përgjithshme të Shqipërisë në Selanik, ku njihej për korrektesën dhe dashurinë me të cilën i shërbente qytetarëve shqiptarë.

Lajmin e ndarjes së saj të parakohshme nga jeta e bëri publik vetë Konsullata e Përgjithshme e Republikës së Shqipërisë në Selanik, përmes një postimi prekës në Facebook:

“E trishtë përtej dhimbjes të shohësh si shuhen këto sy plot jetë. Joana Qyli ka mishëruar mirësinë dhe frymëzimin e një vajze plot dashuri për jetën, familjen dhe miqtë e saj. Si pjesë e stafit të Konsullatës, ajo fitoi respektin dhe ngrohtësinë e kolegëve dhe qytetarëve që me aq korrektësi u shërbeu. Edhe pse në një rrugëtim të shkurtër me jetën, ajo arriti ta ndërtonte atë bukur, me ngjyrat e shpresës dhe forcën për të mposhtur dhimbjen. Ngushëllimet më të ndjera familjes dhe të afërmve për këtë humbje të pafjalë. Qofsh e parajsës, Joana Qyli.”

Pas një beteje të gjatë me një sëmundje të rëndë, Joana mbylli sytë në lulen e rinisë, duke lënë pas dhimbje të thellë tek familja, miqtë dhe kolegët që e vlerësonin për buzëqeshjen dhe shpirtin e saj të mirë.