Fatos Nano i shtruar në spital, gjendja nën kujdes të vazhdueshëm mjekësor

Tiranë, 20 tetor 2025 – Ish-kryeministri i Shqipërisë, Fatos Nano, po trajtohet prej disa ditësh në një spital privat në Tiranë, pas përkeqësimit të një problemi të hershëm shëndetësor.

Burime pranë familjes konfirmojnë se 73-vjeçari ndodhet në kujdes të vazhdueshëm mjekësor që prej 8 tetorit, për shkak të Sëmundjes Pulmonare Obstruktive Kronike (SPOK) – një gjendje që e ka shoqëruar prej vitesh. Nuk është hera e parë që lideri historik i Partisë Socialiste i nënshtrohet trajtimeve spitalore për të njëjtën arsye.

Gjendja e tij po monitorohet nga afër nga ekipi mjekësor, ndërsa familjarët kanë preferuar të mos japin detaje mbi ecurinë e trajtimit, duke ruajtur diskrecion.

Fatos Nano mbetet një nga figurat më të rëndësishme të politikës shqiptare pas viteve ’90. Ai ka mbajtur disa herë postin e kryeministrit dhe ka qenë themeluesi dhe kryetari i parë i Partisë Socialiste, pas transformimit të Partisë së Punës.

Nano u tërhoq nga politika aktive në vitin 2005, pas dorëzimit të drejtimit të Partisë Socialiste, duke qëndruar më pas larg jetës publike pasi dështoi të bëhej President, i refuzuar nga Edi Rama.