Një konflikt i çastit ka përfunduar me dy viktima në orët e para të mëngjesit të sotëm në Manëz të Durrësit. Ngjarja e rëndë ka ndodhur rreth orës 01:45 pranë një karburanti, ku një debat banal në ambientet e një lokali ka përshkallëzuar në përplasje me armë zjarri.

Sipas burimeve zyrtare, 33-vjeçari Flori Paluçi ka qëlluar për vdekje me armë zjarri 23-vjeçarin Aranit Kurti. Pas kësaj, ndaj Paluçit ka hapur zjarr një 21-vjeçar, Daniel Pepa, duke e lënë të vdekur në vend. Autori i dyshuar është shpallur në kërkim nga policia, ndërkohë që forcat blu po vijojnë kontrollet intensive për kapjen e tij.

Burime nga vendngjarja bëjnë me dije se konflikti ka nisur në një lokal, ku njëri prej viktimave dhe një tjetër person kanë hyrë për të porositur një kafe. Kamarieri u ka thënë se ekspresi ishte i fikur, çka ka sjellë një debat të shkurtër. Një tjetër person, i cili ndodhej në lokal, është indinjuar nga sjellja e tyre ndaj kamarierit, dhe situata më pas ka degraduar në përdorimin e armës.

Kamarieri nuk është lënduar dhe nuk rezulton të ketë qenë i përfshirë në përplasjen e armatosur.

Grupi hetimor ndodhet ende në vendngjarje dhe po punon nën drejtimin e prokurorit për të zbardhur rrethanat e plota të ngjarjes, si dhe për të identifikuar nëse ka persona të tjerë të përfshirë në konflikt. Policia ka sekuestruar pamjet e kamerave të sigurisë dhe po administron çdo provë që mund të ndihmojë në zbardhjen e ngjarjes.