Londër – Deklaratat e Kryeministrit shqiptar, Edi Rama, gjatë qëndrimit të tij në Londër për Samitin e Ballkanit Perëndimor, kanë shkaktuar një reagim të ashpër dhe zemërim në mediat dhe qarqe politike britanike. Rama shigjetoi ashpër vendimin e Brexit, duke e lidhur atë direkt me problemet e imigracionit dhe gjendjen emocionale të vendit.

Kritikat Shpërthyese Për Brexit
Gazeta britanike “Daily Express” i cilësoi komentet e Ramës si “shpërthyese”. Rama ironizoi Britaninë duke iu referuar varkave të emigrantëve si “anije të Brexit-it”.

“Ju e latë Evropën sepse donit më shumë lumturi. Tani jeni në depresion.”

“Ju e latë Evropën sepse donit më pak anije dhe keni më shumë anije. Ju e latë Evropën sepse donit më shumë investime. Keni më pak investime.” – Edi Rama, cituar nga Daily Express.

Komentet e Ramës u bënë një ditë para se Kryeministri i Mbretërisë së Bashkuar, Sir Keir Starmer, të priste udhëheqësit e Ballkanit Perëndimor për të diskutuar goditjen e bandave të kontrabandës.

Rama vlerësoi bashkëpunimin me qeverinë aktuale laburiste dhe kritikoi opozitën, duke theksuar se puna e qeverisë është “krejtësisht e ndryshme nga poezia e opozitës”. Ai gjithashtu shigjetoi figurën e Nigel Farage, duke thënë: “Farage nuk është problemi, Farage është një pasqyrë e problemeve.”

Sulmi i Ashpër ndaj Suella Braverman dhe Fyerja Direkte

Tabloidi “The Mirror” e quajti Ramën “kryeministri vizitor” dhe theksoi sulmet e tij ndaj politikanëve që kritikojnë shqiptarët. Rama citohet t’u ketë kërkuar atyre që i kritikojnë shqiptarët të “mbyllin gojën” (Shut the fuck up).

Ai e thelloi sulmin ndaj ish-Sekretares së Brendshme Konservatore, Suella Braverman, e cila në vitin 2023 iu referua “kriminelëve shqiptarë”.

“Meqë ra fjala, ku është ajo?” tha ai me shaka. Dhe shtoi: “Thjesht mbaje mend, e di, mos u merr me shqiptarët sepse nëse shqiptarët të mallkojnë, thjesht zhdukesh.” – Edi Rama, cituar nga The Mirror.

Rama u bëri thirrje politikanëve britanikë të mos i përmendin shqiptarët për asgjë tjetër, përveçse për arsye shumë të mira, duke theksuar kontributin e tyre në komunitetin britanik.

Reagimi i Zëshëm i Burimit Britanik
Komentet e Ramës sollën një reagim të zëshëm nga një burim pranë Ministrisë së Brendshme Britanike, i cili ishte në detyrë kur mijëra shqiptarë kalonin Kanalin:

“Edi Rama nuk ka idenë se për çfarë po flet. Nëse ai do ta bënte vërtet punën e tij, shqiptarët nuk do të kishin ikur për në Mbretërinë e Bashkuar në turma. Ai duhet të shpenzojë më pak kohë duke folur në publik dhe më shumë kohë duke marrë mbrapsht numrin rekord të kriminelëve shqiptarë që mbushin burgjet tona,” – burim i cituar nga Daily Express.

Deklaratat e Kryeministrit shqiptar, të cilat u pasqyruan edhe nga “The Independent”, vijnë në një kohë kur migracioni i paligjshëm përmes Ballkanit Perëndimor mbetet një çështje kyçe për sigurinë dhe politikën britanike.