Një 35-vjeçare shqiptare, nënë e dy vajzave të vogla, është shpallur e humbur në Itali, ndërsa familjarët i janë drejtuar redaksisë së JOQ Albania për ndihmë.

Gruaja quhet Floresha Prengu dhe prej disa vitesh jeton në rajonin e Trentos, në veri të Italisë. Sipas mediave italiane, ajo është zhdukur mëngjesin e së mërkurës, më 22 tetor, dhe prej asaj dite nuk ka më asnjë kontakt me familjen.

Autoritetet italiane kanë ndërmarrë kërkime të gjera, përfshirë përdorimin e helikopterëve dhe skuadrave të polumbarëve përgjatë lumit Adige, por deri më tani kërkimet nuk kanë dhënë rezultat.

Në një apel të publikuar në mediat italiane, familjarët e saj shprehen:

“Ju lutemi, na ndihmoni të gjejmë Floresha Prengun. Nuk kemi më asnjë lajm prej saj. Kushdo që e ka parë ose ka ndonjë informacion, të kontaktojë menjëherë forcat e rendit.”

Policia italiane ka shpërndarë një njoftim zyrtar në të gjitha prefekturat e vendit, ndërsa kërkimet vijojnë pa ndërprerje.

Familjarët dhe miqtë e Floresha-s shpresojnë që ajo të gjendet sa më shpejt dhe të kthehet pranë vajzave të saj të vogla.