Një ngjarje e paprecedentë ka tronditur sportin shqiptar. Volejbollistja braziliane e ekipit të Dinamos është pezulluar dhe akuzuar se nuk është femër, duke u detyruar të kryejë analiza për verifikimin e gjinisë.

Dyshimet, sipas burimeve, kanë nisur nga thashetheme dhe biseda korridoresh mes klubeve kundërshtare, pa asnjë provë apo dokument zyrtar. Ndërkohë, sportistja është përballur me presion të madh psikologjik dhe është detyruar të izolohet në shtëpi për ditë të tëra.

“Është situata më e vështirë e jetës sime. Luaj volejboll që kur isha 12 vjeç dhe askush nuk më ka trajtuar ndonjëherë kështu. Ajo që po ndodh është diskriminim. Nuk më kanë dhënë asnjë arsye ligjore pse më pezulluan. Thjesht e bënë”, ka thënë ajo me lot në sy.

Volejbollistja, e cila ka një karrierë 15-vjeçare në kampionate europiane dhe aziatike, e cilëson këtë përvojë si “një padrejtësi që ka shkatërruar emocionalisht një sportiste dhe një grua”.

Rasti ka ngritur debat të fortë në opinionin sportiv për mënyrën se si trajtohen sportistet e huaja dhe për mungesën e mbrojtjes ndaj diskriminimit në sportin shqiptar.