Qielli i Moskës është ndriçuar nga një dritë e gjelbër gjigante që u pa nga qindra qytetarë, duke krijuar spektakël dhe konfuzion në të njëjtën kohë. Pamjet e publikuara në rrjete sociale tregojnë një objekt të ndritshëm që kalon me shpejtësi mbi ndërtesa të larta, duke lënë pas një gjurmë shkëndijash dhe më pas zhduket në re.

Shumë banorë thanë se panë një “meteorit shumë të ndritshëm dhe që lëvizte ngadalë”, ndërsa pamjet u bënë menjëherë virale, duke kujtuar meteorin e famshëm të Chelyabinsk të vitit 2013, i cili shkaktoi dëme dhe la disa persona të plagosur. Në këtë rast, nuk raportohet për dëme apo të lënduar, por ngjarja ka hapur diskutime të gjera në internet.

Disa ekspertë rusë besojnë se bëhet fjalë për një meteorit të vogël që u dogj në atmosferë, fenomen që ndodh shpesh pa rrezik për publikun.

Megjithatë, në rrjete sociale u përhapën teori të tjera, nga mbetje hapësinore deri te objekte fluturuese të paidentifikuara (UFO).

Një komentues shkroi me ironi: “Nëse është i gjelbër, ndoshta Thor ka zbritur në Rusi”, ndërsa të tjerë aluduan për armë sekrete ruse apo satelitë të vjetër që digjeshin në hyrje të atmosferës.

Ngjarja ndodhi në orët e hershme të mëngjesit të 27 tetorit, ndërsa videoja u shpërnda mijëra herë brenda pak orësh. Sipas ekspertëve, drita e gjelbër mund të vijë nga djegia e metaleve si magnezi, nikeli ose bakri, që ndodhen në trupat kozmikë apo satelitë të vjetër.

Një fenomen i ngjashëm u raportua edhe në Britani disa ditë më parë, kur një objekt ndriçoi qiellin e Londrës, duke e bërë edhe më të fortë debatin global mbi këto shfaqje misterioze në qiell.