Gjykata e Apelit të Tiranës ka prishur pjesërisht vendimin e Gjykatës së Tiranës për personat e pandehur lidhur me vdekjen tragjike të 3-vjeçarit Brian Spahia. Vendimi i apelit ka sjellë ndryshime në masën e sigurisë për disa nga të pandehurit, duke prekur kryesisht masat ndaj Marta Gina-s, Roland dhe Ina Xhaxhi, si dhe dy mjekëve të Institutit të Mjekësisë Ligjore (IML), Elton Serani dhe Erindo Allo.

Sipas vendimit të Apelit, për Marta Ginën është ndryshuar masa e sigurisë, duke kaluar nga “arrest në shtëpi” në “detyrim paraqitje”, një ndryshim që lehtëson kushtet për të, por ende e mban atë nën mbikëqyrje. Ndërkohë, për Roland dhe Ina Xhaxhi, kërkesa për heqjen e masës së sigurisë “arrest në shtëpi” është refuzuar, duke lënë të pandryshuar vendimin për ta.

Një tjetër zhvillim i rëndësishëm ka të bëjë me dy mjekët e IML-së, Elton Serani dhe Erindo Allo. Apeli ka hequr masën e “pezullimit nga detyra”, që ishte caktuar nga Gjykata e Tiranës për një periudhë një mujore. Ky ndryshim i masave vjen pas hetimeve për ngjarjen tragjike që ndodhi dy vite më parë, kur Brian Spahia humbi jetën pas një ndërhyrjeje dentare në klinikën “Splendent”, ku u realizuan 14 operacione për dhëmbët e tij. Vdekja e tij u shkaktua nga mbidoza e anestezisë.