Aktivistë dhe përfaqësues fetarë u mblodhën para Kuvendit për të protestuar kundër projektligjit për barazinë gjinore. Protestuesit mbajnë pankarta ku shkruhet “Ka vetëm dy gjini, mashkull dhe femër” dhe shprehin shqetësimin se ligji cënon traditën shqiptare.
Koalicioni Pro Familjes dhe Jetës argumenton se projektligji ndryshon me dhunë nocionet e burrit dhe gruas, duke mos respektuar parimet e bazuara në kulturën dhe traditën kombëtare. Sipas tyre, edhe pse disa përkufizime në nenin 4, që tregojnë qartë se gjinia është burrë ose grua, janë miratuar dhe ndryshuar, këto nuk janë reflektuar në nenet e tjera të ligjit.
Protestuesit kritikojnë gjithashtu përdorimin e togfjalëshit “gjinia gjithpërfshirës” në nenet e tjera të projektligjit, duke përmendur konkretisht Nenit 10, ku sipas tyre kjo formulë mund të krijojë paqartësi dhe të ndryshojë kuptimin e parimeve themelore të gjinisë.
