Hotelet, motelet e bujtinat detyrohen me ligj të deklarojnë jo më pak se 65% shfrytëzim në verë dhe 30% në dimër. Qeveria vendos standarde të reja për shfrytëzimin e hoteleve dhe strukturave akomoduese – Detyrimi, për deklarim tatimor

Tiranë – Këshilli i Ministrave ka miratuar një vendim sot që synon rregullimin dhe monitorimin e shfrytëzimit të strukturave akomoduese në Shqipëri, duke vendosur kriteret minimale të kapacitetit të shfrytëzimit dhe detyrimin për deklarim tatimor.

Çfarë parashikon vendimi?

📌 Strukturat e akomoduara (bujtina, motelet, hotelet, resortet, etj.) do të duhet të raportojnë kapacitetin e shfrytëzimit sipas dy periudhave sezonale:

1 maj – 30 shtator – Kapaciteti i shfrytëzimit nuk duhet të jetë më pak se 65%

1 tetor – 30 prill – Kapaciteti i shfrytëzimit nuk duhet të jetë më pak se 30%

📌 Raportimi i detyrueshëm – Sipërmarrësit e këtyre strukturave duhet të deklarojnë tek ministria përgjegjëse për turizmin dhe administrata tatimore të dhënat mbi përdorimin e kapaciteteve të tyre.

📌 Kontroll tatimor mbi të ardhurat – Nëse deklarimi i kapacitetit të shfrytëzimit bie nën normat minimale, administrata tatimore ka të drejtë të korrigjojë deklarimin dhe të bëjë vlerësime nga zyra për detyrimet fiskale.

📌 Monitorim i rreptë nga autoritetet – Tatimet do të kryejnë verifikime në terren për të shmangur deklarime të pasakta dhe mashtrime tatimore.

📌 Afatet për zbatimin – Për vitin 2025, deklarimi fillestar duhet të bëhet brenda 30 ditëve nga hyrja në fuqi e vendimit.

Qëllimi i vendimit

Ky vendim synon të rrisë transparencën në sektorin e turizmit, të shmangë evazionin fiskal dhe të sigurojë që bizneset turistike të operojnë në mënyrë të rregullt.

Me hyrjen në fuqi të këtyre masave, hotelet dhe akomodimet turistike do të jenë të detyruara të deklarojnë qarkullimin real, duke ndihmuar në formalizimin e sektorit turistik dhe në rritjen e të ardhurave në buxhetin e shtetit. /noa.al