Një denoncim ka mbërritur në redaksinë tonë nga një punonjëse e personelit shëndetësor në Shqipëri, e cila përballet prej vitesh me vonesa të pagave, veçanërisht për pagën e muajit dhjetor.

Sipas saj, paga e muajit dhjetor merret në fund të muajit janar.

Ajo tregon se ky problem është kthyer në një fenomen të zakonshëm, ndërkohë që institucionet përgjegjëse nuk po marrin masa për t’i dhënë zgjidhje.

Një tjetër shqetësim i ngritur është frika e përhapur mes punonjësve për të denoncuar situatën ose për të ngritur zërin.

Mesazhi i plotë i denoncueses:

“Përshëndetje JOQ, jemi të mësuar tashmë për vonesat e pagave të personelit shëndetësor në shërbimin spitalor, sidomos kur vjen muaji Janar dhe ende paga e muajit aktual dhjetor nuk mund të merret dhe rreth fundit të muajit janar ankohemi, por të frikësuar. Po ju shkruaj këtë mesazh në mënyrë që të ndërgjegjësohen gjithë institucionet përgjegjëse. Përtej çdo propagande mediatike që bëhet kudo, realiteti ky është në Shqipëri për Shëndetësinë dhe personelin shëndetësor, mjafton fasada. Askush nuk po i jep drejtim kësaj çështjeje e cila vazhdon prej vitesh, paga e muajit dhjetor merret në fund të janarit. Të penalizosh këtë popull i cili po mbijeton përmes asaj page. Sa prej tyre janë kryefamiljarë e në pamundësi për të bërë një punë tjetër kanë mbetur në mëshirë të asaj rroge në Shqipëri? Dhe shprehja më e përdorur kudo është: ‘Mos u anko se rrezikon vendin e punës.’ Kemi frikë të flasim e të ngrihemi.”
Problemi i vonesave të pagave në sektorin shëndetësor është një nga sfidat më të mëdha me të cilat përballen punonjësit, ndërkohë që shumë prej tyre janë kryefamiljarë që mbështeten vetëm te kjo pagë për të mbijetuar.