Arsimi parauniversitar do të ndryshojë tërësisht kurrikulën mësimore. Nga shtatori i 2026 tekstet e nxënësve në shkolla do të jenë më të thjeshta dhe më konkrete se në programet aktuale.

Do të aplikohet sërish metoda spirale e rimarrjes së njohurive nga viti në vit, por synohet t`i jepet përparësi nxitjes së mendimit kritik dhe zgjidhjes së situatave. Kurrikulat e reja do t’i përafrohen metodave të testeve ndërkombëtare, aty ku nxënësit shqiptare dalin gjithmonë dobët, ndërsa elementi “i të mësuarit përmendësh” do të jetë edhe më i zbehtë.

Gert Janaqi, drejtues i Agjencisë së Sigurimit të Cilësisë, tregon se në lëndën e gjuhës shqipe, letërsisë, historisë e gjeografisë përforcohen temat e idnetitetit kombëtar. Ndërsa në lëndët e shkencave ekzakte do të hyjnë metodat e reja edhe të teknologjisë së informacionit. Reforma e re kurrikulare do të nisë me klasat e para, të gjashta dhe të dhjeta, duke vijuar vit pas viti deri në 2029.

Edhe pse reforma synon përmirësimin e programeve lëndore, ajo nuk e prek planin mësimor. Që do të thotë, edhe me këtë ndryshim, lënda e gjuhës shqipe dhe letërsisë, në arsimin 9-vjecar, do të mbeten të shkrira në një libër, për t`u ndarë si lëndë dhe orë më vete vetëm në gjimnaz