Gjykata e Shkodrës ka vendosur të lirojë nga qelia dy të rinjtë, të arrestuar pas sherrit të ndodhur në shkollën e mesme “Shenjaze Juka”.

Klevin Thepi, 24 vjeç, dhe Doronesto Kulla, 19 vjeç, u lanë në masën e sigurisë “detyrim paraqitje”, ndryshe nga “Arrest me burg”, që iu ishte caktuar më parë. Ata dyshohet se ishin organizatorët e sherrit që përfshiu rreth 15 adoleshentë, të ndarë në dy grupe, kryesisht të moshës 17–18 vjeç.

Konflikti nisi me grushte dhe më pas u përshkallëzua me përdorimin e sendeve të forta, ndërsa gjatë përleshjes dyshohet se është përdorur edhe armë e ftohtë (thikë). Si pasojë e dhunës, tre adoleshentë mbetën të plagosur lehtë dhe u transportuan në spitalin rajonal të Shkodrës, ku morën ndihmën mjekësore. Ata ndodhen jashtë rrezikut për jetën.

Sipas hetimeve paraprake, konflikti dyshohet se ka pasur zanafillë një përplasje të mëparshme mes nxënësve. 19-vjeçari Doronesto Kulla dyshohet se është përfshirë në sherr për të ndihmuar vëllain e tij 17-vjeçar, nxënës i shkollës “Shejnaze Juka”, duke u bashkuar në përleshje me persona të tjerë.
s
Pamjet filmike të sekuestruara nga kamerat e sigurisë tregojnë momentin kur dy grupet bashkohen dhe nisin përplasjen fizike, e cila zgjat rreth një minutë, përpara se të shpërndahen. Menjëherë pas ngjarjes, forcat e Policisë së Shkodrës dhe efektivët e njësisë “Shqiponja” ndërhynë në vendngjarje, duke sekuestruar prova filmike dhe duke nisur hetimet.