Zbardhen detaje të reja nga ngjarja tragjike e ndodhur ditën e djeshme në Koplik, ku humbi jetën i riu me iniciale E. K.

Ndonëse informacionet paraprake flisnin për instalim panelesh diellore, Policia e Malësisë së Madhe konfirmoi zyrtarisht sot se 27-vjeçari ka qenë duke montuar një reklamë në tarracën e një mobilierie në momentin që ka rënë në kontakt me rrymën elektrike.

Për këtë ngjarje, ka nisur procedimi penal në gjendje të lirë për shtetasin E. B., 40 vjeç, banues në Koplik. Mbi të rëndon akuza për “Shkeljen e rregullave të mbrojtjes në punë”, pasi dyshohet se mungesa e masave të sigurisë ka çuar në goditjen fatale nga energjia elektrike që i mori jetën të riut.

Njoftimi i Policisë:

Specialistët për Hetimin e Krimeve të Komisariatit të Policisë Malësi e Madhe referuan materialet në Prokurori, ku nisi procedimi në gjendje të lirë për shtetasin E. B., 40 vjeç, banues në Koplik, për veprën penale “Shkelja e rregullave të mbrojtjes në punë”, pasi ditën e djeshme shtetasi E. K., 27 vjeç, dyshohet se duke punuar në një subjekt mobilierie për të vendosur një reklamë në tarracën e subjektit, ka rënë në kontakt me energjinë elektrike dhe si pasojë, ka humbur jetën.