Rrëmbimi i dyshuar i një vajze të mitur dyshohet se ka qenë shkaku kryesor i vrasjes së 20-vjeçarit Pavlin Preka, ngjarje e ndodhur në fshatin Guci e Re, në Shkodër. Kështu rezulton nga hetimet e kryera nga Policia dhe Prokuroria e Shkodrës.

Sipas dosjes hetimore, viktima kishte shfaqur dëshirën për të rrëmbyer vajzën e mitur të 43-vjeçarit Vasel Koçeku, një prej autorëve të dyshuar të krimit. Ky konflikt, i cili kishte nisur prej vitesh, dyshohet se ka çuar në vrasjen e të riut.

Vasel Koçeku dhe bashkëpunëtori i tij, Klaudio Lisaj, nuk e kanë pranuar autorësinë e krimit. Megjithatë, përgjimet telefonike dhe provat e tjera të mbledhura nga grupi hetimor kanë hedhur poshtë pretendimet e tyre. Tre ditë më parë, Gjykata e Shkodrës vendosi masën e sigurisë “arrest me burg” për të dy të dyshuarit.

Sipas hetimeve, Klaudio Lisaj është personi që ka thirrur dhe ka nxjerrë nga banesa 20-vjeçarin Pavlin Preka, ndërsa dyshohet se autori i vrasjes me armë zjarri është babai i vajzës së mitur, Vasel Koçeku.

Hetimet tregojnë se motivi i krimit lidhet me një konflikt të gjatë, që kishte në qendër dëshirën e viktimës për t’u fejuar me vajzën e Koçekut, e cila aktualisht është 16 vjeçe. Ngjarja e ka zanafillën rreth tre vite më parë, kur Pavlin Preka i kishte kërkuar dorën për fejesë familjes Koçeku. Në atë kohë, vajza ishte 13 vjeçe dhe kërkesa ishte refuzuar nga babai i saj, me argumentin se ajo ishte shumë e vogël dhe duhej të vazhdonte shkollën.

Pavarësisht refuzimit, Preka dyshohet se ka vijuar të shfaqë interes për vajzën dhe t’u shprehet personave të tjerë se kishte ndërmend ta rrëmbente për t’u martuar me të.

Sipas Prokurorisë, mëngjesin e 20 shkurtit, Klaudio Lisaj e ka nxjerrë viktimën nga banesa, ndërsa pak më vonë Pavlin Preka është qëlluar për vdekje me armë zjarri.

Për zbardhjen e plotë të ngjarjes, Policia dhe Prokuroria e Shkodrës kanë kryer një sërë veprimesh hetimore, përfshirë përgjime telefonike dhe marrjen e dhjetëra deklarimeve nga persona të ndryshëm, si dhe nga vetë të dyshuarit. Hetimet vijojnë.