Një stuhi e fuqishme dimërore përfshiu sot disa pjesë të Shteteve të Bashkuara, duke sjellë reshje bore dhe ndërprerje të energjisë elektrike në Midwest, ndërsa zona të tjera u përballën me rënie të temperaturave, erëra të forta dhe një kombinim të borës, akullit dhe shiut.

Në Rrafshnaltat veriore dhe pjesë të Midwest-it të sipërm, duke përfshirë Iowën, Dakotën e Veriut dhe Minesotën, Shërbimi Kombëtar i Motit paralajmëroi për kushte stuhie bore dhe “bardhësi totale”, duke e bërë trafikun pothuajse të pamundur në disa seksione, raporton AP.

Në Iowa, më shumë se 200 milje të autostradës I-35 u mbyllën, ndërsa dhjetëra aksidente, përfshirë një viktimë, u raportuan gjatë stuhisë.

Në pjesë të Minesotës dhe Dakotës së Veriut, u regjistruan erëra jashtëzakonisht të forta, të cilat përkeqësuan më tej kushtet, kështu që temperatura u ndje deri në minus 34 gradë Celsius.

Në rajonin e Liqeneve të Mëdha, stuhia solli reshje të dendura dëbore.

Në Gadishullin e Sipërm të Miçiganit ranë midis 48 dhe 61 centimetra borë dhe meteorologët paralajmëruan se priten më shumë, por më pak, reshje në ditët në vijim.

Erëra të forta dhe bora goditën gjithashtu pjesë të Nju Jorkut, Ohajos dhe Miçiganit, me erëra lokale deri në 120 kilometra në orë.

Meteorologët paralajmërojnë gjithashtu për stuhi të reja që mund të sjellin reshje të dendura shiu më vonë gjatë javës, përfshirë ditën e Vitit të Ri.

Në të gjithë vendin, më shumë se 350,000 familje mbetën pa energji elektrike, ndërsa në trafikun ajror u regjistruan më shumë se 3,500 vonesa dhe më shumë se 600 fluturime të anuluara.

Meteorologët thonë se stuhia mund të intensifikohet më tej ndërsa lëviz drejt lindjes, për shkak të përplasjes së ajrit të ftohtë nga veriu dhe ajrit jashtëzakonisht të ngrohtë mbi pjesët jugore të SHBA-së.