Nëse suksesi matet me numrin e shiritave të verdhë dhe gëzhojave të mbledhura nga toka, atëherë Policia e Shtetit mund ta quajë 2025-ën një vit të arritur. Me 39 krime nga janari në nëntor, atentate në mes të ditës, krime banale dhe ekzekutime mafioze, reagimi institucional mbeti pothuajse gjithmonë i njëjtë: mbërritje me vonesë, deklarata standarde dhe premtime për hetime “intensive”. Ndërsa krimi veproi lirshëm, shteti u shfaq kryesisht si pjesë e pasojave, jo si garant i sigurisë.

Në vijim, një përmbledhje e ngjarjeve më të rënda kriminale të vitit 2025, ku për secilën vrasje mbetet i njëjti emërues, viktima në tokë, autorë të lirë ose të vonuar dhe një polici që mbërrin gjithmonë pas krimit, për të bërë atë që di më mirë, të numërojë gëzhojat.

6 janar – Dragoç, Shkodër

Ramzan Mataj u gjet i vrarë brenda makinës së tij në një atentat të mirëorganizuar. Ngjarja ndodhi pa asnjë ndërhyrje parandaluese nga policia. Arrestimet erdhën vetëm pasi krimi kishte tronditur zonën.

12 janar – Tiranë

Biznesmeni Bujar Nasufi u ekzekutua pranë “Pallatit me Shigjeta”. Autori dhe organizatorët u identifikuan më vonë, ndërsa atentati u krye në mes të ditës. Policia reagoi pasi gjithçka kishte përfunduar.

13 janar – Vlorë

Kristian Marku u vra në një atentat të lidhur me konflikte të vjetra kriminale. Ai ishte person me precedentë të njohur për institucionet. Asnjë masë parandaluese nuk ishte marrë para vrasjes.

24 janar – Tiranë

Lulzim Visha u vra dhe autori u arrestua pas ngjarjes. Krimi ndodhi në kryeqytet, pa asnjë pengesë nga forcat e rendit. Reagimi i policisë ishte sërish pas faktit.

27 shkurt – Shkodër

Pavlin Preka u ekzekutua në një tjetër ngjarje të rëndë kriminale. Dy persona përfunduan në pranga pas hetimeve. Zona vijon të mbetet problematike për krimin e rëndë.

17 prill – Lezhë

Gjovalin Prendi u vra në një atentat që dyshohet për hakmarrje. Deri në fund të vitit nuk pati autorë të arrestuar. Policia u kufizua në deklarata dhe hetime pa rezultat.

1 qershor – Lezhë

Pjetër Kaza u vra për shkak të një gjakmarrjeje që daton prej vitit 1994. Konflikti ishte i njohur prej vitesh, por nuk u parandalua. Një tjetër krim i paralajmëruar që ndodhi pa pengesë.

4 qershor – Durrës

Ermir Dedja u vra në një atentat me armë zjarri. Disa persona u arrestuan për përfshirje direkte dhe organizim. Ngjarja tregoi mungesë totale kontrolli në zonat urbane.

4 gusht – Vau i Dejës

Frrok Lleshaj u vra në vazhdën e një zinxhiri të gjatë gjakmarrjeje. Rasti mbeti pa autorë të identifikuar. Policia pranoi pistën, por jo zgjidhjen.

14 gusht – Maliq

14-vjeçari Erald Xhejo u vra me thikë nga një bashkëmoshatar pas një sherri banal. Ngjarja tronditi opinionin publik. Reagimi institucional erdhi vetëm pas humbjes së jetës.

28 gusht – Postribë

Pirro Prroni u vra, ndërsa autori u dorëzua vetë në polici. Rasti u zbardh shpejt, por krimi nuk u parandalua. Siguria në zonat rurale mbetet e dobët.

4 shtator – Shkodër

Kristian Kola u vra pas një sulmi me armë zjarri. Ngjarja ndodhi në një zonë të njohur për precedentë kriminalë. Policia mbërriti pasi atentati ishte kryer.

8 shtator – Shkodër

Armando Pali dhe Liridon Kraja u vranë në një lokal, ndërsa disa persona mbetën të plagosur. Autori u arrestua më vonë. Krimi ndodhi në një ambient publik, pa asnjë kontroll.

18 shtator – Shkodër

Mirel Çokaj u gjet i pajetë në një humnerë. Familjarët dyshojnë për vrasje të lidhur me kanabisin. Hetimet vazhdojnë, por pa rezultate konkrete.

6 tetor – Tiranë

Gjykatësi Astrit Kalaja u vra brenda sallës së gjyqit gjatë një seance. Ngjarja tronditi rëndë sistemin e drejtësisë dhe ekspozoi dështimin e sigurisë. Autori u arrestua pas krimit.

22 tetor – Manzë

Dy persona u vranë pas një sherri banal për një kafe. Pas një sherri banal u vranë Flori Paluçi dhe Aranit Kurti. Ngjarja ndodhi jashtë një lokali në Manzë, ndërsa sherri nisi për një kafe. Dhuna e përditshme arriti një nivel alarmant.

28 tetor – disa ngjarje, Berat, Tiranë, Durrës

Keli Hoxha u vra pas një konflikti banal në Berat për kalin dhe autori tentoi të arratisej. Po atë ditë, në Tiranë një kuzhinier u vra me thikë Indrit Ismaillari, i cili u vra me thikë nga kolegu i tij Filip Shehu. Në Durrës, një djalë, Marjan Kodheli vrau babanë e tij Pjetër Kodheli. Tre krime në një ditë treguan kolaps të sigurisë.

11 nëntor – Rinas

Një atentat i rëndë ndodhi pranë Rinasit, ku u vranë dy persona, mes tyre një punonjës i AMP-së. Ngjarja kishte tipare mafioze. U vra Gilmando Dani dhe agjenti i AMP-së, Muçi Shaliani (Sheqeri). Hetimet vijojnë, ndërsa autorët u goditën pas ngjarjes.

26 nëntor – Durrës

15-vjeçari Erion Boba u plagos rëndë pas një sherri të nisur në rrjete sociale dhe ndërroi jetë në spital. Autori ishte bashkëmoshatar. Një tjetër tragjedi që nisi online dhe përfundoi me vdekje.

30 nëntor – Elbasan

Biznesmeni Mondi Mëhalla u vra brenda automjetit të tij. Disa persona u arrestuan për përfshirje në krim. Viti u mbyll ashtu si nisi me atentat dhe viktimë.