Një denoncim i qytetarëve ka nxjerrë në pah diferenca të mëdha çmimesh mes produkteve të rrjetit të njohur të kozmetikës dhe kujdesit personal “Rossmann&Lala” në Shqipëri dhe atyre që tregtohen në Gjermani.

Sipas krahasimeve të bëra nga qytetarët, të njëjtat produkte, me të njëjtin brand dhe gramazh, në tregun shqiptar shiten ndjeshëm më shtrenjtë, duke arritur deri në 7 mijë lekë të vjetra më shumë se në dyqanet e kësaj marke në Gjermani.
Në një video të publikuar në rrjetet sociale, qytetari ironizon situatën duke e quajtur rrjetin “RossmannsaKrahu”, ndërsa tregon konkretisht çmimet e produkteve të ekspozuara në dy vende të ndryshme, duke ngritur pikëpyetje serioze mbi politikat e çmimeve në Shqipëri.

“Rossmann&Lala” është prej vitesh një nga rrjetet më të përhapura në tregun shqiptar të kozmetikës, me prezencë në qytetet kryesore të vendit dhe me produkte të markave ndërkombëtare të njohura. Megjithatë, ky denoncim ka rikthyer në vëmendje shqetësimin e vazhdueshëm të konsumatorëve shqiptarë për abuzimet me çmimet, krahasuar me tregjet europiane.
Rasti ngre pyetje edhe për rolin e institucioneve përgjegjëse për mbrojtjen e konsumatorit dhe monitorimin e tregut, në një kohë kur qytetarët përballen me kosto gjithnjë e më të larta për produkte bazë të përditshme.

Shqiperia Sot do të vijojë ndjekjen e këtij denoncimi për të hedhur dritë mbi arsyet e këtyr diferencave të mëdha çmimesh dhe për të informuar publikun mbi çdo zhvillim të mëtejshëm,