Një 50-vjeçar, i cili po trajtohej në Repartin e Kujdesit Intensiv të Spitalit Papageorgiou në Selanik, u bë dhurues organesh, duke i dhënë shpresë dhe jetë pesë pacientëve të tjerë.
Pas konstatimit të vd*kjes cerebrale, familja e tij mori vendimin fisnik për të dhuruar organet, duke e kthyer dhimbjen e humbjes në një akt solidariteti dhe humanizmi të rrallë.
Menjëherë pas vendimit, nisi procedura e marrjes së organeve të përshtatshme për transplant. Operacioni u përfundua të martën, më 6 janar 2026.
Zemra e dhuruesit u mor nga një ekip mjekësor i Qendrës së Transplanteve në Torino, ndërsa veshkat dhe mëlçia u hoqën nga ekipi kirurgjikal i Spitalit Hipokratio të Selanikut.
Korneat u morën nga ekipi i transplantit të Klinikës Universitare Oftalmologjike të Spitalit Papageorgiou.
Në një njoftim zyrtar që citon noa.al, drejtuesit e Spitalit Papageorgiou shprehën ngushëllimet e sinqerta për familjen e 50-vjeçarit dhe e përgëzuan atë për vendimin e guximshëm dhe human, duke theksuar se në momentin e dhimbjes më të madhe arriti të lidhë jetën me vd*kjen dhe t’u dhurojë një shans të ri jetese njerëzve të tjerë.
Spitali falënderoi gjithashtu të gjitha ekipet mjekësore të përfshira në proces, nën koordinimin e Zyrës Rajonale të Organizatës Kombëtare të Transplanteve (EOM).
Duke e konsideruar dhurimin e organeve si një nga format më të larta të vullnetarizmit dhe solidaritetit njerëzor, Spitali Papageorgiou u bën thirrje qytetarëve të mbështesin dhurimin e indeve dhe organeve, me qëllim rritjen e numrit të dhuruesve dhe shpëtimin e më shumë jetëve në të ardhmen. /noa.al