Një gabim i rëndë i policisë në Britaninë e Madhe ka dalë në dritë gjatë një seance hetimore, ku autoritetet pranuan se kishin informuar familjen e gabuar për vd ekjen e një adoleshenti pas një aksidenti rrugor fatal.

Ngjarja ka ndodhur në Rotherham, South Yorkshire, ku dy të rinj, Joshua Johnson, 18 vjeç, dhe Summer Louise Scott, 17 vjeçe, humbën jetën në një aksident të rëndë.

Megjithatë, për shkak të një ngatërrimi të dokumenteve të identifikimit të gjetura në vendngjarje, policia njoftoi gabimisht familjen e 17-vjeçarit Trevor Wynn se djali i tyre kishte ndërruar jetë, ndërkohë që ai ndodhej i shtruar në spital, nën sedacion.

Si pasojë e këtij gabimi, për rreth 22 ditë, familja e Trevorit jetoi me bindjen se djali i tyre kishte vdekur, ndërsa familja e Joshuas qëndroi pranë shtratit të spitalit, duke shpresuar se ai do të zgjohej nga koma. E vërteta doli në pah vetëm pasi babai i Joshuas ngriti dyshime, kur Trevor doli nga sedacioni.

Hetimi zbuloi se në vendngjarje ishin gjetur disa sende personale, përfshirë telefona dhe karta identiteti, të cilat nuk ndodheshin drejtpërdrejt në trupat e viktimave. Këto rrethana çuan në identifikim të gabuar, i cili më pas u konfirmua vetëm pas testeve mjeko-ligjore.