Jetnor Merko, kamionisti që shmangu një tragjedi të mundshme në aksidentin e 24 dhjetorit në Skrapar, është shpallur “Heroi i muajit dhjetor”.

Mëngjesin e asaj dite, Jetnori ishte nisur për në punë si çdo ditë tjetër, pa e ditur se do të përballej me një situatë që do t’i ndryshonte rrjedhën ditës. Në aksin rrugor të Çorovodës, ai u përball me një aksident të rëndë, ku një automjet me disa të rinj kishte dalë nga rruga dhe kishte mbetur varur në një zonë tepër të rrezikshme, pranë lumit.

Pa hezituar, kamionisti nga Korça ndërhyri menjëherë. Ai lidhi një litar të fortë në kamionin e tij dhe e mbajti automjetin e aksidentuar të stabilizuar, duke parandaluar rënien në lumë, deri në mbërritjen e forcave zjarrfikëse.

Zjarrfikësit dhe shërbimet e tjera të emergjencës ndërhynë më pas për nxjerrjen e të rinjve nga automjeti, të cilët fatmirësisht shpëtuan pa pasoja fatale. Falë reagimit të shpejtë dhe guximit të Jetnor Merkos, tre të rinjtë u nxorën të sigurt dhe u shmang një tragjedi e mundshme.

I vlerësuar për aktin e tij, Jetnori shpreson të ketë shërbyer si shembull për të tjerët. Ai u bën thirrje drejtuesve të mjeteve, veçanërisht të rinjve, që të respektojnë me rigorozitet rregullat e qarkullimit rrugor, duke theksuar se vetëm përmes kujdesit dhe përgjegjësisë mund të parandalohen aksidentet në rrugë.