Sajmir Bulica, një qytetar nga Shkodra i është drejtuar redaksisë sonë për të kërkuar një të drejtë që thotë se po i mohoet prej kohësh.

Ai tregon se nga martesa me ish-bashkëshorten e tij, Pranvera Hoxha, ka ardhur në jetë një vajzë e cila sot është 7-vjeçe. Sajmiri në vitin 2019 ka kryer një dënim prej 6 muaj e 20 ditë burg për shkak të konflikteve në familje dhe dhunës së ushtruar ndaj ish-bashkëshortes.

Pas daljes nga burgu, ai tregon se është ribashkuar me Pranverën, por konfliktet kanë vazhduar nga të dyja palët, deri kur në vitin 2024 vendosën të bënin divorc.

Pas divorcit, gjykata i njohu të drejtë Sajmirit që të mbajë vajzën e tij çdo fundjavë nga ora 10:00 e të shtunës deri në orën 10:00 të së dielës. Madje të ketë kontakte të përditshme telefonike me të, të martën dhe të enjten e çdo jave, t’a shëtisë 3 orë në një park lojërash, ndërsa dy javë në verë dhe dy në dimër të ketë të drejtë ta marrë për pushime.

Sajmiri thotë se ish-bashkëshortja nuk zbaton asnjë prej këtyre vendimeve të gjykatës, madje vazhdon t’i bëjë denoncime në polici për kanosje dhe kërcënime, pavarësisht se nuk jetojnë më bashkë.

Ai tregon se ka 4 muaj pa e parë vajzën, dhe kërkon që kjo padrejtësi të marrë fund. Ai bën thirrje publike që institucionet përgjegjëse të reagojnë dhe kjo çështje të marrë zgjidhje.