Një situatë alarmante paraqitet prej kohësh në zonën e pallateve pranë Stacionit të Trenit, në Unazën Lindore të Shkodrës. Pamjet e siguruara nga terreni tregojnë një realitet të trishtë: mbeturina inerte, plehra urbane, rrënoja ndërtimi dhe hapësira publike të shkatërruara, duke e kthyer lagjen në një vatër kaosi dhe rreziku për banorët.

Edhe pse larg qendrës së qytetit dhe zonës pedonale, kjo lagje është e banuar nga qytetarë të rregullt, taksapagues dhe kontribues prej dekadash për Shkodrën. Mes tyre ka edhe ish-ushtarakë, familje të vjetra shkodrane dhe të moshuar, të cilët ndihen të braktisur nga institucionet vendore.

Banorët shprehen se mungesa e ndërhyrjeve nga Bashkia dhe strukturat përgjegjëse ka sjellë degradim të vazhdueshëm të zonës, duke ndikuar drejtpërdrejt në cilësinë e jetesës, sigurinë dhe shëndetin publik. Hapësirat mes pallateve janë shndërruar në pika grumbullimi mbetjesh, ndërsa infrastruktura është thuajse inekzistente.

Apeli i tyre është i qartë: kërkohet më shumë vëmendje dhe ndërhyrje konkrete për pastrimin, sistemimin dhe rehabilitimin e zonës. Sipas banorëve, Shkodra nuk mund dhe nuk duhet të reduktohet vetëm te pedonalja dhe qendra turistike.

“Shkodra s’asht veç pedonalja”, shprehen ata, duke kërkuar trajtim të barabartë dhe dinjitoz për çdo lagje të qytetit.

Tashmë mbetet në dorën e institucioneve vendore që ky realitet të mos mbetet thjesht një denoncim, por të pasohet nga veprime konkrete në terren.