Një valë e jashtëzakonshme solidariteti ka përfshirë shqiptarët, të cilët në një kohë rekord janë bashkuar për të ndihmuar modelen dhe influenceren e njohur Dajana Kalo, e cila po përballet me një gjendje të rëndë shëndetësore.

Brenda pak orësh nga thirrjet për ndihmë, janë mbledhur mbi 200 mijë euro, shumë që do të shërbejë për ndërhyrjen mjekësore dhe procesin e gjatë të rikuperimit që e pret 25-vjeçaren.

Dajana ndodhet e shtruar në QSUT që prej 29 dhjetorit, pasi ka pësuar një hemorragji cerebrale, e shkaktuar nga një Malformacion Arteriovenoz (AVM), një gjendje serioze dhe kërcënuese për jetën, ku enët e gjakut në tru janë të formuara në mënyrë jonormale dhe mund të çahen pa paralajmërim.

Aktualisht, ajo nuk është në gjendje të ecë dhe të lëvizë anën e djathtë të trupit. Për shkak të situatës së rëndë, motra e saj, Bora, ka ndërprerë edhe punën për t’u kujdesur vazhdimisht për Dajanën, ndërsa familja është përballur me kosto të larta që nuk mund t’i përballonte e vetme.

Apeli për ndihmë u përhap gjerësisht në rrjete sociale, u mbështet nga shumë figura publike dhe u publikua edhe nga JOQ Albania mbrëmjen e djeshme, duke ndihmuar që mesazhi të arrinte te mijëra qytetarë.

Rezultati ishte prekës: mijëra shqiptarë kontribuuan, secili sipas mundësisë, duke treguar edhe një herë se në momentet më të vështira, solidariteti mbetet forca më e madhe.

Ndërkohë, Dajana vijon të qëndrojë në pavionin e neurokirurgjisë në QSUT, ku pritet të kryhen ekzaminime të specializuara, përfshirë arteriografinë (DSA), e nevojshme për të vendosur për ndërhyrjen kirurgjikale dhe hapat e mëtejshëm të trajtimit.

Ky reagim masiv është një mesazh shprese, jo vetëm për Dajanën dhe familjen e saj, por edhe një dëshmi se shqiptarët dinë të bashkohen dhe të bëhen një, kur dikush ka vërtet nevojë.