Autoritetet policore të Emirateve të Bashkuara Arabe kanë arrestuar në Dubai një shtetas shqiptar 39 vjeç, i shpallur në kërkim ndërkombëtar nga drejtësia italiane. Lajmi bëhet i ditur nga mediat italiane, sipas të cilave ai ishte dënuar me 8 vite e 7 muaj burg për përfshirje në trafik ndërkombëtar droge.

39-vjeçari akuzohet se ishte kreu i një organizate të madhe kriminale që operonte në Itali dhe Shqipëri, duke trafikuar kokainë, marijuanë dhe hashash drejt vendeve të tjera evropiane, përfshirë Holandën. Gjatë aktivitetit kriminal, ai banonte në Noale, në provincën e Venecias, dhe konsiderohej drejtuesi operativ dhe vendimmarrës i grupit.

Sipas autoriteteve italiane, organizata nën drejtimin e tij vepronte kryesisht në zona si Mestre, Scorzè, Noventa di Piave dhe Jesolo, duke menaxhuar si furnizimin ndërkombëtar me lëndë narkotike, ashtu edhe shpërndarjen në tregjet lokale.

Shqiptari ishte në arrati që prej vitit 2019. Zbulimi i vendndodhjes së tij erdhi pas një “gabimi” gjatë periudhës së fundvitit, kur ai ftoi familjarët e tij në Dubai, duke tërhequr vëmendjen e autoriteteve hetuese.

Arrestimi u krye falë bashkëpunimit mes Policisë italiane, Interpolit dhe autoriteteve të Emirateve të Bashkuara Arabe, në kuadër të projektit “WANTED”, i cili synon kapjen e personave në kërkim ndërkombëtar. Identiteti i të arrestuarit nuk është bërë ende publik.