Natyra vijon të surprizojë njerëzimin me shfaqjet e saj spektakolare dhe njëkohësisht të frikshme. Një rrufe gjigante ndriçoi qiellin e Atlantës, SHBA, pas një stuhie të fuqishme që ka përfshirë rajonin në ditët e fundit.
Pamjet e këtij fenomeni mbresëlënës atmosferik, të publikuara nga mediat amerikane, u bënë virale në rrjetet sociale, ku u shpërndanë nga mijëra përdorues. Edhe e përditshmja italiane “La Repubblica” e risolli ngjarjen me një video që tregon forcën e jashtëzakonshme të rrufesë, një fenomen i rrallë që ndodh në këto përmasa.
Ndërkohë, moti i ashpër vazhdon të godasë pjesën jugperëndimore të Shteteve të Bashkuara. Shteti i Georgia-s është veçanërisht i prekur nga stuhitë e fuqishme dhe tornadot, të cilat kanë shkaktuar dëme të konsiderueshme dhe përçarje në disa zona. Autoritetet po monitorojnë situatën, ndërsa qytetarët janë paralajmëruar për kushtet ekstreme të motit.
