Një ngjarje e rëndë e denoncuar vetëm dy ditë më parë në redaksinë e JOQ ka marrë tashmë reagim zyrtar nga autoritetet. Policia e Mallakastrës ka nisur procedim penal ndaj 40-vjeçarit që shfaqej në një video duke nxitur qentë e stanit të sulmonin një mushkë të gjallë, e cila më pas ngordhi si pasojë e plagëve të marra.

Videoja, e publikuar fillimisht nga 40- vjeçari në grupet e facebook dhe e denoncuar nga qytetarët në JOQ, tregonte momentet tronditëse kur çobani inkurajonte qentë të sulmonin kafshën e pambrojtur, ndërsa ajo rrëzohej në tokë dhe nuk arrinte t’u shpëtonte kafshimeve. Pas publikimit të rastit dhe reagimit të qytetarëve, strukturat e Policia e Shtetit ndërhynë, duke verifikuar ngjarjen dhe identifikuar autorin e dyshuar.

Sipas njoftimit zyrtar, specialistët për Hetimin e Krimeve të Komisariati i Policisë Mallakastër referuan materialet në Prokurori dhe nisën procedimin penal ndaj shtetasit G. S., 40 vjeç, banues në fshatin Gjerbës, Mallakastër.

Njoftimi i plotë i policisë:

“Specialistët për Hetimin e Krimeve të Komisariatit të Policisë Mallakastër referuan materialet në Prokurori, ku nisi procedimi penal për shtetasin G. S., 40 vjeç, banues në fshatin Gjerbës, Mallakastër, pasi bazuar në një video të publikuar në portalin ‘JOQ’, dyshohet se ka nxitur qentë për të sulmuar një kafshë (mushkë), e cila si pasojë e sulmit, ka ngordhur.

Materialet procedurale iu referuan Prokurorisë, për veprime të mëtejshme.”

Rasti ka shkaktuar reagime të forta në opinionin publik, ndërsa mbetet për t’u parë se cilat do të jenë hapat e mëtejshëm ligjorë ndaj 40-vjeçarit.