Bashkia e Shkodrës thotë se ka pasur rritje të niveleve të lumenjve Drin dhe Bunë, si dhe të Liqenit të Shkodrës gjatë pasdites së sotme, sipas një njoftimi nga Korporata Elektroenergjike Shqiptare (KESH).

Kjo ka ardhur për shkak të shkarkimeve të kontrolluara nga hidrocentralet në Fierzë, Koman dhe Vau i Dejës, por edhe reshjeve. Sipas bashkisë, mund të ketë rritje të mëtejshme të niveleve të lumenjve, veçanërisht në territorin e Nënshkodrës. Megjithatë, Bashkia e Shkodrës sqaron se ka marrë të gjitha masat dhe ekipet janë në terren.

“Korporata Elektroenergjike Shqiptare (KESH) ka njoftuar se prej paradites së sotme kanë nisur shkarkimet e kontrolluara nga hidrocentralet në kaskadën e lumit Drin: Fierzë, Koman dhe Vau i Dejës. Si pasojë e shkarkimeve, si dhe për shkak të reshjeve dhe rritjes së temperaturave, gjatë pasdites është konstatuar rritje e niveleve të lumenjve Drin dhe Bunë, si dhe të Liqenit të Shkodrës. Situata mund të sjellë rritje të mëtejshme të niveleve të lumenjve, veçanërisht në territorin e Nënshkodrës. Bashkia Shkodër ka marrë të gjitha masat e nevojshme për menaxhimin e situatës në bashkëpunim me strukturat e emergjencave civile. Ekipet janë në terren, në monitorim të pandërprerë dhe në gatishmëri të plotë për çdo zhvillim”-, thuhet në njoftim.