Është zbardhur dëshmia e autorit të vrasjes së 48-vjeçarit Skerdilajd Isufi në Kavajë, ngjarje e ndodhur një ditë më parë. Sipas deklaratës së Landi (Puja) Derajit, ai ka qëlluar viktimën me thikë në zemër pas një konflikti që ka nisur për një vend parkimi. Deraji ka treguar se situata ka dalë jashtë kontrollit kur Isufi e ka ofenduar përpara familjes së tij.

“Skerdilajd erdhi dhe parkoi makinën para shtëpisë time. I kërkova ta lëvizte, por ai më tha ‘po ik futu brenda se e di çfarë të bëj apo jo?!’ Pastaj nisi të shante para familjes. Nuk durova dot, shkova brenda në shtëpi dhe mora thikën. Kur më pa me thikë në dorë, më sulmoi,” ka deklaruar Deraji, duke përshkruar momentin që çoi në vrasje. Ai ka shtuar se ka goditur viktimën dy herë në gjoks dhe e ka parë atë të bjerë në tokë.

Deraji ka thënë se pas ngjarjes ka përjetuar panik dhe është larguar, duke u fshehur deri në momentin e arrestimit. “Sigurisht që në momentin e parë u pendova, por hataja ishte bërë. Më vjen shumë keq, nuk doja që të përfundonte kështu, por mu errësuan sytë dhe nuk e kontrollova dot veten,” ka shprehur ai, duke theksuar pendesën e tij për aktin e kryer.