Një histori rrëqethëse e sakrificës dhe dhimbjes u rrëfye këtë të diel në emisionin “Ka Një Mesazh Për Ty” në “E Diela Shqiptare” në Tv Klan. Dea, një grua që ka përjetuar humbjen më të madhe të një nëne, ndau historinë e saj tronditëse mbi martesën e vështirë, dhunën psikologjike dhe braktisjen.

E rritur në një familje të madhe me një nënë të vetme që kujdesej për gjashtë fëmijët, Dea mendonte se kishte gjetur strehën e saj kur u martua në vitin 1985. Por realiteti ishte ndryshe. Bashkëshorti i saj ishte i dhënë pas alkoolit dhe kishte marrëdhënie jashtëmartesore, ndërsa ajo përpiqej të mbronte fëmijët nga e vërteta e dhimbshme.

Tragjedia goditi familjen në vitin 2003, kur vajza e tyre, Era, ndërroi jetë në moshën 14-vjeçare nga një gjendje e rëndë gripale. Disa vite më vonë, djali i tyre, Sildi, humbi jetën nga një atak kardiak në moshën 20-vjeçare. Në vend që të ishte mbështetje për të shoqen, burri i Deas e përzuri nga shtëpia, duke i kërkuar të largohej ose të qëndronte si shërbëtore për të dhe për gruan e re që planifikonte të merrte.

“E dija që më tradhtonte, por në momentin kur më duhej më shumë mbështetja e tij, ai më nxori në rrugë bashkë me nënën time të sëmurë,” tregon Dea. Për vite të tëra ajo sakrifikoi gjithçka për familjen, por në fund mbeti pa strehë dhe mbështetje.

Historia e saj ka prekur thellë shikuesit, duke sjellë në vëmendje vështirësitë dhe padrejtësitë me të cilat përballen gratë në situata të ngjashme.