Një aksident masiv ka ndodhur rreth orës 15:00 në bypass-in Fier-Vlorë, ku shtatë automjete janë përfshirë në një zinxhir përplasjesh, duke shkaktuar panik dhe lëndime te disa nga pasagjerët dhe drejtuesit e mjeteve.

Sipas informacionit paraprak, në aksident janë përfshirë automjetet që drejtoheshin nga shtetasit A. B., E. Gj., Sh. K., A. B., V. N., R. M. dhe M. V.

Përplasja e fortë ka shkaktuar dëmtime fizike te dy pasagjere, shtetaset M. Rr., 52 vjeçe dhe S. Rr., 32 vjeçe, të cilat janë dërguar menjëherë në spital për ndihmë mjekësore.

Gjithashtu, për kontroll dhe ekzaminime mjekësore janë transportuar në spital edhe tre prej drejtuesve të automjeteve: R. M., 46 vjeç, M. V., 45 vjeç, V. N., 22 vjeçe, si dhe një foshnjë vetëm 1 vjeç, që ndodhej në njërin prej automjeteve të aksidentuara.

Në vendngjarje ndodhet grupi hetimor, i cili po punon për të zbardhur shkakun dhe dinamikën e saktë të aksidentit, ndërsa qarkullimi në bypass ka qenë i vështirësuar për disa minuta. /noa.al