Familja Sula është tronditur nga humbja e vajzës së tyre, Ilaria, vetëm 22 vjeç, e cila u shua padrejtësisht në duar të ish-të dashurit të saj, një 23-vjeçar filipinas, Mark Antony Samson. Ilaria kishte shkuar në Romë për të studiuar statistikë, një degë që e donte shumë, por jeta e saj u ndërpre tragjikisht nga një akt dhune.

Prindërit e saj, Flamuri dhe Gëzime Sula, kanë folur për dhimbjen e madhe që po përjetojnë në një intervistë për televizionin italian RAI. Gëzime Sula tha: “Nuk e di si do ia bëj pa Ilarian. Ishte gjithçka për mua, ishte gjithçka. Ma shkulën nga zemra.”

Flamuri, babai i vajzës, i shkatërruar nga dhimbja, kërkon drejtësi për vajzën e tij: “E vranë dhe e hodhën brenda një valixheje. Çfarë ishte ajo, një objekt? Vajza ime nuk ishte një objekt, ishte një njeri,” tha ai mes lotësh.

Ilaria kishte pritur me padurim të diplomonte, dhe fliste shpesh për fustanin që do të vishte për ditën e diplomimit. Por tragjedia ia ndërpreu jetën para se të realizonte ëndrrën.

Kohët e fundit, autorët e krimit janë përpjekur të shprehin keqardhje, gjithashtu dhe mamaja e autorit që kërkoi të dërgojë një letër për familjen Sula për të kërkuar falje, por prindërit e Ilaria janë të dëshpëruar dhe nuk mund të kuptojnë se si një akt i tillë mund të ishte mundësuar.

Familja Sula tani ka mbetur vetëm me kujtimet dhe një audiomesazh të vajzës së tyre, një kujtim i një jetë që u ndërpre shumë herët.

VIDEO: Mesazhi zanor i publikuar nga RAI

Familja Sula falenderoi të gjithë të pranishmit në ceremoninë mortore të vajzës së tyre.

“Gjithë ata njerëz që morën pjesë në hidhërimin tonë më dhanë forcë mua dhe familjes. I falenderoj forcat e policisë në Romë dhe Terni për punën e tyre. Falenderoj të gjithë studentët, shokët e klasës dhe miqtë e Ilarias. Falenderoj komunitetin italian dhe shqiptar që ishin pranë familjes sime. Faleminderit të gjithëve”, tha Flamuri.

Në lidhje me vrasjen e Ilaria Sulës janë arrestuar Mark Antony Samson dhe mamaja e tij. Kjo e fundit e ndihmoi që të fshihte trupin e pajetë.

Sipas hetimeve, pas vrasjes Samson ka shkuar për të ngrënë me një shoqen e Ilarias. Madje ai ka përdorur telefonin e saj për të devijuar hetimet duke dërguar mesazhe sikur ishte ajo dhe se do të kthehej.

Këto veprime tregojnë shumë për natyrën e vrasësit filipinas që i mori jetën një vajze në lule të rinisë.