Një dokument i deklasifikuar i CIA-s nga epoka e Luftës së Ftohtë ka dalë sërish në qarkullim, duke nxitur diskutime të shumta për shkak të një ngjarjeje të pazakontë, ku një grup ushtarësh sovjetikë thuhet se janë përballur me një UFO dhe më pas janë shndërruar në gurë nga “qeniet jashtëtokësore”.

Dosja prej 250 faqesh, e marrë nga KGB pas shpërbërjes së Bashkimit Sovjetik në vitin 1991, përshkruan një incident të ndodhur në Ukrainë gjatë një stërvitjeje ushtarake, kur një UFO në formë disku fluturues u qëllua me raketë nga ushtarët dhe u rrëzua.

Sipas dëshmive të përfshira në raport, nga anija e rrëzuar dolën pesë qenie të shkurtra, me kokë të madhe dhe sy të zinj. Këto qenie, pas rrëzimit, u bashkuan dhe formuan një sferë që shpërtheu me një dritë verbuese. Si pasojë, 23 ushtarë që e panë fenomenin u shndërruan në… shtylla guri!

Vetëm dy ushtarë që ndodheshin në hije mbijetuan. Trupat e “gurëzuar” dhe mbetjet e UFO-së u morën nga KGB dhe u dërguan në një bazë sekrete pranë Moskës. Shkencëtarët sovjetikë zbuluan se indet e trupit të ushtarëve ishin kthyer në një substancë identike me gurin gëlqeror.

CIA, në përfundim të raportit, shkruan:

“Nëse kjo dosje është e vërtetë, bëhet fjalë për një rast tejet kërcënues. Jashtëtokësorët duket se zotërojnë armë dhe teknologji përtej çdo imagjinate.”

Ky dokument u deklasifikua në vitin 2000 dhe u raportua fillimisht nga tabloidi kanadez Weekly World News dhe gazeta ukrainase Holos Ukrayiny. Ngjarja u rikthye në vëmendje vitin e kaluar edhe në podcast-in e njohur “The Joe Rogan Experience”, duke ndezur sërish debatet për kontaktet e mundshme me jashtëtokësorë.

Historia vjen në një kohë kur interesimi për UFO-t është rritur ndjeshëm, sidomos pas krijimit të UAP Task Force nga Departamenti Amerikan i Mbrojtjes në vitin 2020.