Dy ditë më parë, më 19 prill, kantieri i ndërtimit të Aeroportit të Vlorës u bë sërish skenë e një ngjarjeje të rëndë, ku për herë të dytë brenda katër muajsh, një punëtor humbi jetën tragjikisht gjatë orarit të punës. Viktima Dorian Hasani 38-vjeç, kishte vetëm dy ditë që ishte punësuar në kantier.

Sipas informacioneve ekskluzive të siguruara nga JOQ Albania, përmes një të afërmeje të tij, Doriani punonte pa sigurime dhe ishte i vetmi mbështetës ekonomik për familjen: bashkëshorten, dy fëmijët e mitur, një vajzë 10-vjeçare dhe një djalë 5-vjeç, si dhe nënën e tij, e cila është e tronditur nga lajmi i kobshëm.

Kjo është tragjedia e dytë që godet të njëjtin kantier brenda një kohe të shkurtër. Më 17 janar, punëtori Nusret Xhoka, 60 vjeç nga Dibra, humbi jetën si pasojë e një aksidenti me një fadromë.

Në rastin e fundit, policia ka arrestuar administratorin e kompanisë ku punonte Doriani. Por a është e mjaftueshme kjo masë për të parandaluar përsëritjen e ngjarjeve kaq të rënda në të ardhmen?

Ndërkohë, Inspektoriati Shtetëror i Punës, institucioni përgjegjës për kontrollin dhe zbatimin e masave të sigurisë në vende pune, duket se ka “marrë pushimet” para kohe. Mungesa e inspektimeve në terren është alarmante, ndërsa familjarët e punëtorëve jetojnë çdo ditë me ankthin nëse të dashurit e tyre do të kthehen të sigurtë në shtëpi në fund të ditës.

Mesazhi i të afërmit për JOQ Albania:

“Doja te ngreja nje shqetsim qe po na vret çdo dite, djali qe vdiq ne aeroportin e Vores kishte vetem dy dite qe kishte filluar pune aty, ( pa sigurime ), dhe qe la pas nje familje me femij te mitur qe e priste ne shtepi ,dhe nenen qe I plasi zemra me kte vdekje tragjike,..dhe sa do vdesin ne kte menyre ?? , une ate djal e kam te afërt.

Nuk kam prova dhe foto..se nuk e di kush si ka ndodhur ajo gje..por di te ju them qe per buken e gojes ka shkuar dhe pas ka lene dy femij 10 vjece dhe 5 vjec. Ky eshte Doriani.

Une nuk e kam vella por e kam dashur shume..eshte njeri I afert I familjes time….dhe me vjen shume keq qe kto raste nuk bertiten nga shteti por jane te etur per karrige dhe askush nuk pyet me per jeten e njerzve te shtreses se varfer..eshte shume e rende me besoni sepse kam kaluar kalvar vete mbi kurriz dhe akoma po kaloj pa I plas shtetit se si dhe a duhet te marim fryme dhe ne qe skemi fuqine e pushtetin, dhe sa do vuajme ne kte forme?!!”