Toru Ueda nga Japonia ka bërë realitet ëndrrën e tij më të çuditshme: përmes një kostumi super realist të ujkut, ai ka arritur të “braktisë” jetën njerëzore dhe të gjejë paqe si një kafshë! Zbuloni pse ky fenomen po çmend internetin…

Toru Ueda, një inxhinier 32-vjeçar nga Tokio, realizoi ëndrrën e tij të fëmijërisë duke shpenzuar 19,000 £ për një kostum ujku të bërë me porosi nga Zeppet Workshop, një kompani e specializuar për kostume realiste për film dhe TV. Ueda, i cili fillimisht e mbante sekret identitetin e tij, tani tregon hapur për ndjesinë e jashtëzakonshme që përjeton kur vesh kostumin: “Ndihem i lirë nga marrëdhëniet njerëzore dhe problemet e përditshme.”

Kostumi, që mori mbi 50 ditë për t’u realizuar, është ndërtuar për të pasqyruar një ujk të vërtetë që ecën në dy këmbë. Ueda punoi ngushtë me ekipin e Zeppet, duke siguruar që çdo detaj të përputhej me vizionin e tij, madje përgatiti edhe një libër me foto referuese. Kostumi përfshin elemente praktike, si vrima ventilimi dhe dizajn që lehtëson veshjen pa ndihmë.

Për Uedën, transformimi në ujk nuk lidhet me famën apo spektaklin, por me gjetjen e paqes së brendshme. “Të gjitha shqetësimet zhduken kur e vesh,” shprehet ai.

Fenomeni i transformimit në kafshë po bëhet gjithnjë e më i njohur në Japoni. Vitin e kaluar, një tjetër japonez, i njohur si Toco, shpenzoi 12,500 £ për t’u shndërruar në një kollie madhësie njerëzore, duke dokumentuar eksperiencën e tij në YouTube.

Ndërkohë, suksesi i Uedas ka shtuar kërkesën për kostume të ngjashme tek Zeppet, me mbi 50 klientë të rinj që kanë bërë porosi për përdorim personal.