Pamje të reja kanë mbërritur në redaksinë e JOQ Albania nga zjarri që përfshiu dy banesa në lagjen nr. 4 të Pogradecit mbrëmjen e sotme.

Në video shihet një prej banoreve të prekura, e cila shfaqet e revoltuar, duke fajësuar zjarrfikëset për mungesë të ujit.

“S’ka ujë liqeni i Pogradecit?!” – shprehet ajo e revoltuar mes dëshpërimit, duke theksuar se prej dy orësh zjarrfikëset nuk kanë mundur të vënë flakët nën kontroll.

Zjarri ka shkrumbuar plotësisht dy banesa që kishin një çati të përbashkët, ku jetonin 5 familje.

Fatmirësisht, nuk raportohen persona të lënduar, pasi banorët kanë arritur të dalin në kohë nga shtëpitë e përfshira nga flakët. Megjithatë, dëmi ekonomik është kolosal, pasi të gjitha pronat dhe orenditë brenda banesave janë djegur.

“Zjarrfikësja nuk kishte ujë të mjaftueshëm,” deklaruan dëshmitarët nga vendngjarja, duke shtuar se ndihma e autoriteteve ka qenë e vonuar dhe e paefektshme. Ky fakt është konfirmuar edhe nga një qytetar që raportoi fillimisht ngjarjen në redaksinë tonë, i cili tha: “Zjarrfikësja erdhi pa ujë dhe mjetet e duhura.”

Shkrumbimi i dy banesave ka lënë 5 familje në qiell të hapur, të cilët tashmë përballen me pasigurinë për të gjetur një strehë. Situata ka ngritur edhe njëherë pikëpyetje mbi gatishmërinë dhe efektivitetin e shërbimeve emergjente në raste të tilla.

Kjo ngjarje e rëndë duhet të shërbejë si një alarm për autoritetet lokale që të rishikojnë kapacitetet e zjarrfikësve në qytetin e Pogradecit, për të shmangur fatkeqësi të tilla në të ardhmen.