Kërkimet për 29-vjeçarin Ardit Beshiri, i cili mbeti i bllokuar nën një masiv dheu në fabrikën e përpunimit të kromit në Qafën e Burrelit, vazhdojnë ende pa rezultat.

Arditin, i cili po punonte me një eskavator, e zuri poshté një rrëshqitje e madhe dheu që e mbuloi bashkë me mjetin me të cilin punonte.

Babai i tij, Nerim Beshiri, ka bërë një apel për ndihmën e autoriteteve shtetërore dhe institucioneve për të siguruar mjetet e nevojshme për kërkime. Sipas tij, vetëm disa ushtarë kanë arritur në vendngjarje, por me mjetet e disponueshme (cizme dhe lopata), kërkimet janë të pamjaftueshme, pasi rrëshqitja ka përmasa shumë të mëdha, deri në 4 km.

““Kanë ardhur 6-7 ushtarë, kane ardhur vetëm me cizme dhe lopata. Nuk bëhet kjo punë kështu, duhen makina të mëdha. Na duhen mjete të specializuara apo edhe qen i përgatitur për zbulime të tilla. Kemi nevojë për ndihmë, institucionet të më ndihmojnë të gjejmë djalin.

Beshiri thotë se janë braktisur nga kompania kineze që ka marrë me qira fabrikën “Nuk janë dukur fare, erdhën dje bënë ca letra dhe askush nuk është sot këtu”, thotë Beshiri.

Përveç shqetësimeve të familjes, ka një reagim të vakët nga kompania kineze që ka marrë me qira fabrikën e kromit. Sipas babait të Arditit, kompania nuk ka ofruar asnjë ndihmë konkrete dhe ka braktisur situatën pas një vizite të shkurtër për të bërë disa formalitete.

Kërkimet vazhdojnë, ndërkohë që familja dhe banorët e zonës po shpresojnë për një zgjidhje të shpejtë dhe një mbështetje më të madhe nga shteti.