Barcelona është sundimtari absolut i futbollit spanjoll këtë sezon, pasi e ka kompletuar kurorën e trefishtë: fituan La Ligën dy javë para përfundimit të kampionatit, duke shtuar këtë trofe në koleksionin ku përfshihen edhe Superkupa dhe Kupa e Mbretit.

Gëzimi i tifozëve katalanas është i dyfishtë, pasi të gjitha trofetë u siguruan në përballje të drejtpërdrejta me rivalin më të madh, Real Madridin, ndërsa titulli i kampionatit u konfirmua duke mposhtur rivalin tjetër lokal, Espanyolin.

Pas ndeshjes, futbollistët e Barcelonës festuan me entuziazëm trofeun më të fundit. Fillimisht në dhomat e zhveshjes së stadiumit të Espanyolit, ku nuk u penguan nga reagimi i rivalëve, por u kujdes trajneri Hansi Flick që të ruhej qetësia. Më vonë, festa u zhvendos në rrugët e qytetit me një autobus të hapur, ku ata festuan bashkë me tifozët.

Një nga lojtarët më të çliruar gjatë festimeve ishte Inigo Martinez. Gjatë kalimit me autobusin e hapur, ai u ngjit në buzë të mjetit dhe në një moment humbi ekuilibrin duke rënë prej tij. Ai ra me shpinë, por fatmirësisht nuk pësoi lëndime serioze. Sipas mediave spanjolle, situata mund të kishte qenë shumë më e rëndë, por lojtari shpëtoi pa pasoja.