Ermir Dedja, është 29-vjeçari (më herët u tha 25) i ekzekutuar në mesnatë në lagjen 18 të Durrësit.

I riu u qëllua me armë zjarri teksa ecte në këmbë dhe humbi jetën në spital si pasojë e plagëve të marra.

Sipas njoftimit paraprak nga policia, ngjarja ka ndodhur në rrethana ende të paqarta, ndërkohë që grupi hetimor po punon për zbardhjen e plotë të ngjarjes dhe identifikimin e autorëve.

Mësohet se Dedja nuk ishte emër i panjohur për autoritetet. Ai kishte qenë më parë i arrestuar në vitin 2015, i dyshuar për shitje të lëndëve narkotike drejt dy shtetasve nga Hasi, që synonin ta trafikonin drogën në Kosovë.

Po ashtu, në vitin 2017, Dedja ishte ndaluar për përkrahje të autorit të një plagosjeje, si dhe për mbajtje pa leje të armës së ftohtë, pasi gjatë kontrollit fizik i ishte gjetur një thikë.

Për momentin, policia po heton pistat e mundshme të atentatit, përfshirë edhe të kaluarën kriminale të viktimës, si një nga shkaqet e mundshme të ekzekutimit.