Pas një pranvere me reshje dhe temperatura të larta për sezonin, vera e 2025-ës pritet të sjellë një kthesë të madhe – dhe jo për mirë. Sipas parashikimeve të Severe Weather Europe, Europa po përgatitet për një verë më të thatë, më të nxehtë dhe me rrezik të shtuar nga valët ekstreme të të nxehtit.
Meteorologët thonë se modelet atmosferike kanë ndryshuar ndjeshëm, duke treguar se temperaturat mbi mesataren sezonale dhe mungesa e reshjeve do të dominojnë pjesën më të madhe të kontinentit, veçanërisht nga mesi i verës e në vazhdim.
Kjo situatë është pasojë e një presioni të lartë atmosferik të qëndrueshëm që ka “bllokuar” ciklonet larg qendrës së Europës, duke favorizuar thatësirën në veri dhe veriperëndim.
Ekspertët paralajmërojnë se ky skenar nuk është vetëm shqetësues për bujqësinë, por edhe për shëndetin publik, për shkak të rrezikut të rritur nga temperaturat ekstreme dhe mungesa e reshjeve freskuese.
