Alarm për bombë në një hotel luksoz në Tiranë: evakuohet “Plazza”, forcat xheniere në vendngjarje

Tiranë – Një alarm për vendosjen e një sasie eksplozivi ka shkaktuar panik mbrëmjen e sotme në zemër të kryeqytetit. Rreth orës 19:35, një punonjëse e stafit të hotelit “Plazza”, i ndodhur në rrugën “Abdi Toptani”, ka telefonuar në Sallën Operative të Policisë së Tiranës duke deklaruar se është njoftuar nga një person i panjohur për vendosjen e një bombe në parkimin e hotelit.

Menjëherë në vendngjarje kanë mbërritur forca të shumta policie, të cilat kanë rrethuar zonën dhe kanë kryer evakuimin e personelit dhe klientëve të hotelit, në kuadër të masave të sigurisë. Paraprakisht nuk raportohet për të lënduar.

Njëkohësisht, janë njoftuar edhe forcat xheniere për të kryer kontrollin e plotë të objektit dhe verifikimin e informacionit të marrë.

Policia njofton se pas përfundimit të kontrollit dhe veprimeve hetimore, do të bëjë publik një informacion më të detajuar mbi rastin.

Hetimet janë në vijim për të identifikuar burimin e alarmit dhe për të përcaktuar nëse bëhet fjalë për një rrezik real apo një alarm të rremë. /noa.al