Një ngjarje e rëndë është shënuar në ujërat detare shqiptare ditën e sotme (1 qershor), ku një shtetas i huaj ka humbur jetën dhe një tjetër është gjetur në gjendje kritike nga Policia Kufitare gjatë një patrullimi rutinë.

Sipas njoftimit zyrtar, një mjet i Policisë Kufitare ka konstatuar një motor uji në det të hapur me dy persona në bord. Motori ishte fikur dhe besohet se të dy personat kanë kaluar orë të tëra në ujë të ftohtë, duke pësuar hipotermi.

Njëri prej tyre, një mashkull ende i paidentifikuar, ka ndërruar jetë, ndërsa personi tjetër është transportuar me urgjencë nga autoambulanca në spital, në gjendje shoku. Asnjëri nga të dy nuk kishte mjete identifikimi me vete.

Ngjarja u regjistrua pranë kalatës zero të portit, ku skafi i Policisë Kufitare bëri transportimin e personave. Grupi hetimor është ngritur dhe po punon për zbardhjen e plotë të rrethanave. Ndërkohë, priten rezultatet e ekspertizës mjeko-ligjore dhe dëshmia e të mbijetuarit për të hedhur dritë mbi qëndrimin e tyre në det dhe rrethanat që çuan në tragjedi.