Një ngjarje e rëndë ka ndodhur pasditen e sotme në zonën e Ali Demit, ku një 15-vjeçar është plagosur me armë zjarri brenda një picerie.
Sipas burimeve zyrtare, rreth orës 17:10, i mituri është paraqitur në spital për ndihmë mjekësore, ku mjekët konfirmuan se ai kishte marrë një plagë nga armë zjarri. Dyshohet se plagosja ka ndodhur si pasojë e një konflikti për motive të dobëta.
Fatmirësisht, adoleshenti ndodhet jashtë rrezikut për jetën dhe po trajtohet nga stafi mjekësor. Në vendngjarje kanë mbërritur menjëherë shërbimet e Policisë dhe grupi hetimor, të cilët kanë nisur hetimet për zbardhjen e plotë të rrethanave.
Policia ka bërë të mundur identifikimin e autorit të dyshuar të plagosjes, por për shkak të ecurisë së hetimit, identiteti i tij nuk bëhet ende i ditur. Forcat e rendit janë në ndjekje të mëtejshme të të dyshuarit, ndërkohë që vijon puna për dokumentimin e plotë të ngjarjes.
L.L.
