Nëse ndonjëherë e keni bërë, apo edhe vetëm e keni menduar për kureshtje apo xhelozi, tani duhet të dini se kontrollimi i mesazheve të partnerit/es në WhatsApp është vepër penale.

Këtë e ka konfirmuar zyrtarisht Gjykata e Lartë e Italisë, e cila e konsideron aplikacionin një sistem informatik të mbrojtur me ligj.

Rasti konkret: Burri që spiunoi ish-bashkëshorten

Rasti që u shqyrtua nga gjykata kishte të bënte me një burrë, i cili gjatë një procesi divorci me ish-bashkëshorten e tij, kishte nxjerrë biseda nga WhatsApp-i, për t’i përdorur si prova në gjyq. Ai kishte hyrë në telefon dhe kishte marrë screenshot-e me informacione të ndjeshme.

Sipas vendimit të gjykatës, burri ka shkelur privatësinë dhe ka hyrë në mënyrë të paligjshme në një sistem të mbrojtur me fjalëkalim, duke kryer vepër penale.

Gjykata thekson se WhatsApp është një sistem informatik në kuptimin juridik, pasi përmes softuerit të tij ndërvepron me rrjetet kompjuterike dhe ruan të dhënat e përdoruesve në mënyrë të mbrojtur.

Kjo do të thotë që hyrja e paautorizuar në të, qoftë edhe nga një person që njeh fjalëkalimin, përbën shkelje ligjore – edhe nëse pajisja është përkohësisht në dispozicionin e tyre.

Edhe me leje, keqpërdorimi është i dënueshëm

Edhe në rastet kur pronari i pajisjes jep leje për përdorim, nëse ajo leje keqpërdoret për të hyrë në biseda apo informacione që nuk janë të autorizuara, personi përgjegjës sërish përballet me pasoja penale.

Dënimet: Deri në 10 vjet burg

Për këto raste, Kodi Penal italian parashikon dënime që shkojnë deri në 10 vite burgim, duke e konsideruar hyrjen në sistem informatik të mbrojtur si një shkelje të rëndë të privatësisë dhe sigurisë personale.