Një ngjarje e rëndë është zbuluar këtë mëngjes në San Severino di Centola, Itali, ku u gjet trupi i pajetë i një 25-vjeçari shqiptar, i cili ishte shpallur i zhdukur që prej së dielës mbrëma pas një tentative grabitjeje të dhunshme në një vilë në Foria di Centola.

Sipas autoriteteve italiane, i riu kishte marrë pjesë bashkë me dy bashkëkombas të tjerë në një grabitje, e cila përfundoi me shkëmbim zjarri mes tyre dhe pronarit të banesës. Një nga autorët tjetër ndodhet në spital me plagë të marra nga arma e zjarrit, ndërsa personi i tretë është ende në kërkim.

Kërkimet për 25-vjeçarin kanë zgjatur për më shumë se 48 orë dhe janë kryer me ndihmën e dronëve, qenve nuhatës dhe dhjetëra efektivëve të karabinierëve. Trupi u gjet në një zonë të pyllëzuar në Limazzo, ndërsa në vendngjarje kanë qenë të pranishëm familjarë dhe bashkëatdhetarë të tij që kishin ruajtur zonën me shpresë për një lajm të mirë.

Sipas hetimeve paraprake, viktima mund të jetë qëlluar nga pushka e pronarit të vilës rreth orës 22:00 të së dielës, por ende nuk është konfirmuar se kush hapi zjarr i pari. Po hetohet edhe mundësia që një armë tjetër – një pistoletë e rrëmbyer – të jetë përdorur nga hajdutët gjatë përplasjes.

Pronari i vilës është tashmë nën hetim, ashtu si edhe shqiptari i plagosur që ndodhet në spitalin “Cardarelli” në Napoli.

Magjistrati Francesco Rotondo ka urdhëruar autopsinë për të sqaruar shkaqet dhe rrethanat e sakta të vdekjes së 25-vjeçarit. Ekspertiza do të jetë vendimtare për të kuptuar trajektoren e plumbit dhe për të zbardhur nëse ka pasur tejkalim të mbrojtjes së pronës nga ana e banorit.

Të afërmit e të ndjerit, të mbledhur në vendin ku u gjet trupi, kanë shpërthyer në lot dhe akuza, duke kërkuar “drejtësi për djalin”. Situata është përshkallëzuar në momente tensioni, ndërkohë që forcat e rendit po mbikëqyrin zonën për të parandaluar incidente të mundshme.

Ngjarja ka shkaktuar tronditje të madhe në komunitetin shqiptar në Itali dhe pritet të ndezë debat mbi çështjet e sigurisë, vetëmbrojtjes dhe përgjegjësisë ligjore në raste të tilla ekstreme.